16.12.2021
Беларускамоўны дзень ў ДУА "Яслі-сад №5 г. Ганцавічы"
О край родны, край Палескі
Опа, опа, опа,
Амерыка, Еўропа,
Азія, Афрыка, Індыя, Кітай…
А дзе наш край?
Павядзі да мяжы
І ўсім дзецям пакажы:
Вось яна,
Відна здаля –
Беларуская зямля!
В. Вітка
16 снежня 2021 году ў ДУА “Яслі-сад №5 г. Ганцавічы” Канановіч Галіна Сяргееўна, выхавальнік дашкольнай адукацыі, разам са сваімі выхаванцамі сярэдняга дашкольнага ўзросту, арганізавалі занятак на тэму “О край родны, край Палескі”.
Спачатку быў экскурс у этнаграфічны куток “Беларуская хатка”. Тут сустрэла дзяцей бабка Ганна, якая прапанавала для сваіх гасцей так званыя пасядзелкі. Тут яна знаёміла рабят з гісторыяй і культурай нашых продкаў, загадвала загадкі, вяла лагодную і добразычлівую гаворку, якая часам аздаблялася легендамі аб незвычайных здарэннях і нават казкамі. Дзеці ў сваю чаргу чыталі вершы і пелі песні на роднай мове.
Пазней да іх далучыўся Несцерка, які прадоўжыў сумесную працу з дзецьмі ў музычнай зале, дзе разам гулялі ў беларускія гульні такія, як “Лянок”, “Чароўная палачка”, “Яблынька”, “Гусі ляцяць”. Кожны момант сустрэчы адлюстроўваў нацыянальны каларыт, россып патрыятычных праменняў, якія ўзнікалі ў дзіцячых душах.
Большую частку ўражанняў чалавек выносіць са свайго дзяцінства. Гэтыя ўражанні застаюцца з ім на ўсё жыццё. Менавіта дашкольны ўзрост прадстаўляе спрыяльныя перспектывы фарміравання ў дзяцей патрыятычных пачуццяў.
Наш педагагічны калектыў у бягучым навучальным годзе працуе над патрыятычнай задачай і лічыць, што праз пазнанне дашкольнікамі мінулага і сучаснага Радімы, яе культуры, традыцый, дасягненняў народа, роднай прыроды, мовы, праз розныя дзіцячыя праяўленні гэтых ведаў, фарміруюцца патрыятычныя пачуцці, якія абумоўлены самой прыродай жыцця чалавека.
